ಕಾಲದಾಚೆಯ ತೀರ... ಹೊಳೆದದ್ದು ತಾರೆ, ಉಳಿದಿದ್ದು ಆಕಾಶ... ಮರಳಿನಂತ ಕನಸು, ಅಲೆಯಂತ ಮನಸು, ಹೀಗೆ ಸುಮ್ಮನೆ ಒಂದಿಷ್ಟು....
ನಿರಂತರ ಚಲನೆ-ನಿರಂತರ ಒಲುಮೆ-ತೆರೆ, ನೋಡಿದಷ್ಟೂ ದೂರ ತೀರ... ಸುಮ್ಮನಿರಲಾರದ ಮನಸಿಗೆ ಸಾಗರದಷ್ಟು ಕನಸು.....

ನವೋನ್ಮಾದ ಸ್ಪಂದನಕ್ಕಾಗಿ http://samudrateera.wordpress.com/

Friday 10 May 2013

ಕಪ್ಪು ಚಿತ್ರದೊಳಗೊಂದು ಬೆಳಕು



ದೇವಾಮೃತ ಗಂಗೆ//ರಘುನಂದನ ಕೆ.

1

ಪುಟ್ಟಿಯ ಪುಟಾಣಿ ಕೈಯಲ್ಲಿ
ಜಗವೊಂದು ಸೃಷ್ಠಿಯಾಗುವ ಸೋಜಿಗ
ಖಾಲಿ ಹಾಳೆಯ ಮೇಲೆ
ಎಳೆದ ಗೆರೆಗಳಲ್ಲೀಗ
ಚರಾಚರಗಳ ಸಂಚಾರ



ವಿಶ್ವದ ಬೃಹತ್ ಗೋಳದೊಳಗೆ
ರೇಖೆ ಚುಕ್ಕಿಗಳಾಗಿ ಮನುಷ್ಯರು
ಪುಟ್ಟ ಬೆರಳು ಗೀಚಿದ
ಹಾಳೆ ತುಂಬ ಬ್ರಹ್ಮಾಂಡ ಕನಸು
ನಳನಳಿಸುವ ಪ್ರೇಮ ಸೊಗಸು


ಪೆನ್ಸಿಲ್ ಗೆರೆಯ ಬೂದು ಬಣ್ಣದಲ್ಲಿ
ಪುಟ್ಟಿಯ ರಂಗುರಂಗಿನ ಪ್ರಪಂಚ
ಅಲ್ಲೆಲ್ಲೋ ಅಜ್ಜಿ ಕಥೆಯ ರಾಜಕುಮಾರ
ಕಣ್ರೆಪ್ಪೆಗಳ ಮೇಲೆ ಕನಸ ಚಿತ್ತಾರ
ವಿಶ್ವವೀಗ ಬಣ್ಣಗಳ ರಂಗೀಲಾರೇ...!

2
ಪುಟ್ಟಿ ಬೆಳೆದಂತೆ ವಿಶ್ವ ಚಿಕ್ಕದು
ಕೈಯೊಳಗಿನ ಪೆಪ್ಪರುಮೆಂಟ ಮುತ್ತಿಕ್ಕಲು
ಕಾದು ನಿಂತಿವೆ ಕಣ್ ದಾಹದ 
ಸಾವಿರ ಇರುವೆಗಳ ಸಾಲು;
ಪುಟ್ಟಿಯ ವಿಶ್ವಕ್ಕೀಗ ಬಣ್ಣಗಳಿಲ್ಲ
ಬಿಳಿಯ ಕ್ಯಾನ್ವಾಸ್ ತುಂಬ
ಹರಿದು ತಿನ್ನುವ ಕಪ್ಪು ಮನುಷ್ಯರು


ಪುಟ್ಟಿಯ ಹಸಿ ಮಣ್ಣ ಮನಸೊಳಗೆ
ಪುರುಷ ಲೋಕದ ಕರಾಳ ರೇಖೆ
ಬದುಕ ಚಿತ್ರ ಕಪ್ಪಿಟ್ಟಂತೆ ಕನಸು
ಬೆಚ್ಚಿ ಬೀಳುತ್ತಾಳೆ ಪುಟ್ಟಿ ನನಸಲ್ಲೂ
ಉಸಿರುಗಟ್ಟಿದೆ ನಿಜದ ಭಾರಕ್ಕೆ
ಕಪ್ಪು ಚಿತ್ರದೊಳಗೊಂದು ಬೆಳಕು


ಚಿತ್ರದೊಳಗಾದರೂ ರಚಿಸಬೇಕಿದೆ
ಎದೆಯ ಬೆಳಗೋ ಮಾನವತೆಯ ಗೀತೆಯ
ಮನುಜ ಪ್ರೇಮದ ಮಮತೆಯ
ಶಕ್ತಿ ಬರಲಿ ಪುಟ್ಟಿಯ ಎಳೆಯ ಬೆರಳಲಿ
ಜಗದ ಕೆಸರ ತೊಳೆದು ರಂಗು ತುಂಬಲು
ನವಿರು ಪ್ರೇಮವ ಬೆಳೆಸಲು.

 * * * * * * * * * *

 ಚಿತ್ರಕೃಪೆ : ಅಂತರ್ಜಾಲ/ಅವಧಿ


10.05.2013ರಂದು “ಅವಧಿ” ಯಲ್ಲಿ ಪ್ರಕಟಿಸಲ್ಪಟ್ಟಿದೆಅವಧಿಯ ಪುಟಗಳಲ್ಲಿ ಓದಲು  ಲಿಂಕ್ ಬಳಸಿ

(ಬಣ್ಣ ಚಿತ್ರಗಳಿಲ್ಲದ ಸಹಜ ಓದಿಗೆ ಭೇಟಿ ನೀಡಿ - http://samudrateera.wordpress.com/ )