ಕಾಲದಾಚೆಯ ತೀರ... ಹೊಳೆದದ್ದು ತಾರೆ, ಉಳಿದಿದ್ದು ಆಕಾಶ... ಮರಳಿನಂತ ಕನಸು, ಅಲೆಯಂತ ಮನಸು, ಹೀಗೆ ಸುಮ್ಮನೆ ಒಂದಿಷ್ಟು....
ನಿರಂತರ ಚಲನೆ-ನಿರಂತರ ಒಲುಮೆ-ತೆರೆ, ನೋಡಿದಷ್ಟೂ ದೂರ ತೀರ... ಸುಮ್ಮನಿರಲಾರದ ಮನಸಿಗೆ ಸಾಗರದಷ್ಟು ಕನಸು.....

ನವೋನ್ಮಾದ ಸ್ಪಂದನಕ್ಕಾಗಿ http://samudrateera.wordpress.com/

Wednesday 22 January 2014

. . . . ಮತ್ತೆಲ್ಲ ಪಳೆಯುಳಿಕೆ


ಕಾವ್ಯ ಲಹರಿ//ರಘುನಂದನ ಕೆ.
ನಿಚ್ಚಳ ಬೆಳಕ
ಬೆರಗು ಪ್ರಪಂಚದಲ್ಲಿ
ಮುಸುಕು ಕತ್ತಲಿನ ಜೀವ
ಖಾಲಿ ಖಾಲಿ ಪುಟ್ಟಗುಟ್ಟು
ಇರುಳ ಪರದೆ ಹಿಂದೆ
ಬಿಕರಿಗಿಟ್ಟ ಬದುಕುಗಳ
ನನಸಲ್ಲೂ ಬಿಕರಿಯಾಗದ
ಕನಸುಗಳ ಅನಾಥ ಭಾವ
ಸಾಲು ಸಾಲು ಗುಟ್ಟು ರಟ್ಟು

ಸುಖವಿರದ ರಾತ್ರಿಗಳಲಿ
ಕಸುವಿರದ ದಾಹಗಳ ಕೂಟ
ಕಾಲನ ಲೆಕ್ಕದಿ ಒಂದು ಕಳೆದು
ತುಟಿ ಕಚ್ಚಿ ಇನ್ನೊಂದು ಕೂಡಿಕೆ
ಗಂಡುಭಾವದ ಬೀದಿಗಳಲಿ
ಪಸೆಯಿರದ ಜೀವಗಳ ನೋಟ
ನೆಲ ಬಿಟ್ಟ ಮಂದಿಗೆಲ್ಲಿ
ಗೊತ್ತು ಬದುಕ ಹೂಡಿಕೆ

ಮೋಜು ಮಸ್ತಿಗಳ
ಬೆಚ್ಚನೆಯ ಫಲಿತಾಂಶಗಳು
ದಿಕ್ಕೆಟ್ಟು ರಸ್ತೆ ಸೇರಿ
ಪರಿತಪಿಸುವ ರೋಧನ
ಹೆಸರಿಲ್ಲದ ಬದುಕಿಗೆ
ಉಸಿರ ತುಂಬಲು
ಬಡಿದಾಡುವ ಕಂದಮ್ಮಗಳ
ಚಡಪಡಿಕೆಗೂ ಬಂಧನ

ನಿಶ್ಚಲ ನಿಜ ಕತ್ತಲ
ಮುರುಕು ಬದುಕಲ್ಲಿ
ಬೆಳಕರಿಯದ ನಿಸ್ತೇಜ ಭಾವ
ಸುತ್ತೆಲ್ಲ ಹಳಹಳಿಕೆ
ಕಾರ್ಗತ್ತಲ ರಾತ್ರಿಯಲಿ
ಬೆಳ್ಳಿ ತಾರೆಗಳ ಗುಂಪು
ನೆಲೆಯಿರದ ಕಪ್ಪು ಪ್ರಶ್ನೆ
ಮತ್ತೆಲ್ಲ ಪಳೆಯುಳಿಕೆ !!

ಚಿತ್ರಕೃಪೆ : ಅಂತರ್ಜಾಲ