ಕಾವ್ಯ ಲಹರಿ//ರಘುನಂದನ ಕೆ.
ಬಯಕೆ ಸುಡು ಮೋಹ ಮಾಯಕ
ದೇಹ ಉರಿವ ಕಡು ಕೆಂಡ
ತಣಿಯ ಬಂದವರೆಷ್ಟು
ಹಣಿದು ಹೋದವರೆಷ್ಟು
ಬಯಕೆ ಬೆಂಕಿ
ತಣಿಯೆ
ಹಿಂಡಿ ಎಸೆದ ಬದುಕು
ಒಳ ಹೊರಗೆ
ಸುಡು ಜ್ವಾಲೆ
ಅರೆ ಬಿರಿದ
ಗುಹೆಯಲ್ಲಿ
ಸರ್ಪ ಚೀತ್ಕಾರದ ನರಳಾಟ
ನಿಶೆ ರಾತ್ರಿಯ ನಶ್ವರದಲ್ಲಿ
ಉಕ್ಕೊ ಬೆಳದಿಂಗಳ ತಾಪ
ಸಿಡಿದ ನಿಹಾರಿಕೆಯ ಶಾಪ
ಕರೆವ ಕೊಳಲ ವ್ಯಾಮೋಹ
ಕೆಂಪು ಗೆರೆಗಳಾಚೆ ಕಂಪನ
ಗೋರಂಟಿಯಿರದ ಯೌವನ
ಕುಲುಕಿ ಮುಲುಕಿ
ಸೋತು
ಕನಸಿಲ್ಲದ ಗರ್ಭಫಲ
ಸುಟ್ಟ ಕಾಮನೆಗಳ ಕಾಲ
ಕುಣಿದು ಕೊಂದವರೆಲ್ಲ
ವಾಂಛೆಗಳ ಸುರಿದು
ಹೋಗಲು
ಕಮರಿಹೋಯ್ತು ದಾಹ
ಸರಿವ ಕಾಲದ ಮೊರೆತ
ಕುದಿವ ದೇಹದ ಭೋರ್ಗರೆತ
ಉರಿದು ಹೋಯ್ತು
ಒಡಲ ಕೆಂಡ
* * * * * * * *
ಚಿತ್ರಕೃಪೆ : ಅಂತರ್ಜಾಲ