ಕಾಲದಾಚೆಯ ತೀರ... ಹೊಳೆದದ್ದು ತಾರೆ, ಉಳಿದಿದ್ದು ಆಕಾಶ... ಮರಳಿನಂತ ಕನಸು, ಅಲೆಯಂತ ಮನಸು, ಹೀಗೆ ಸುಮ್ಮನೆ ಒಂದಿಷ್ಟು....
ನಿರಂತರ ಚಲನೆ-ನಿರಂತರ ಒಲುಮೆ-ತೆರೆ, ನೋಡಿದಷ್ಟೂ ದೂರ ತೀರ... ಸುಮ್ಮನಿರಲಾರದ ಮನಸಿಗೆ ಸಾಗರದಷ್ಟು ಕನಸು.....

ನವೋನ್ಮಾದ ಸ್ಪಂದನಕ್ಕಾಗಿ http://samudrateera.wordpress.com/

Thursday 25 July 2013

ಕಾಯ್ವ ಕಾಮನೆಗಳ ಭಾರ

ಕಾವ್ಯ ಲಹರಿ//ರಘುನಂದನ ಕೆ.

ಎದೆಯ ಗಾಜಿನರಮನೆಯಲ್ಲಿ
ಪ್ರತಿಬಿಂಬಗಳ ಸರಿದಾಟ
ಇಲ್ಲದ ಗೆಜ್ಜೆ ಸದ್ದಿನ ಹುಡುಕಾಟ
ರಾಣಿಯಿರದ ಅಂತಃಪುರದಲ್ಲಿ
ವಿರಹದುರಿಯ ಅಂತರಂಗ

ಸ್ವಪ್ನ ಮಹಲಿನ ಬೀದಿಗಳಲ್ಲಿ
ಮೀನ ಹೆಜ್ಜೆಯ ಗುರುತು
ಸರಸರನೆ ಸರಿವ ಚಿತ್ತ ಚಂಚಲ
ಬಿಡದೆ ಕಾಡುವ ಮೇಘ ಮಲ್ಹಾರ
ಕಾಯ್ವ ಕಾಮನೆಗಳ ಭಾರ

ಎಲ್ಲೆಗಳ ಮೀರಿ ನಿಲ್ಲಲು
ಬಿಡದ ಮಲ್ಲೆಗಳ ಕಂಪು
ಕರೆವ ಕೊರಳ ಇಂಪು
ರಾಜ ಬೀದಿಯಲಿ ಸ್ತಬ್ದ ತೇರು
ಹುಚ್ಚು ಸಖಿಯರ ಕಾವಲು

ಕನಸ ಕಿನ್ನರಿಯ ಕಂಗಳ ಕೊಳದಿ
ಮುಳುಗಿ ಸೋಲುವ ಮನಸು
ಕಿರು ನಗೆಯ ತುತ್ತನಿಟ್ಟು
ತುಟಿ ಜಾರೋ ಮುತ್ತ ನುಂಗಲು
ಹಸಿದು ಕಾದಿದೆ ನನಸು

ಎಷ್ಟೊಂದು ಇರುಳು ಎಷ್ಟೆಲ್ಲ ಶಿಶಿರ
ಸುಟ್ಟು ಉರಿದವು ಕಾಲನ ದೀಪದಲ್ಲಿ
ಸ್ವಪ್ನಲೋಕದ ಸುಂದರಿಯರೆಲ್ಲ
ಕನಸಿನರಮನೆಯೊಳಗಿಂದ
ಮನದೊಳಗಣ ಗುಡಿಗೆ ಬಾರದಿರಲು.

 * * * * * * * * * *
 ಚಿತ್ರಕೃಪೆ : ಅಂತರ್ಜಾಲ
  (ಬಣ್ಣ ಚಿತ್ರಗಳಿಲ್ಲದ ಸಹಜ ಓದಿಗೆ ಭೇಟಿ ನೀಡಿ - http://samudrateera.wordpress.com/)